ဝိညာဉ်

အတိုလွန်လွန်းနေတဲ့
အိပ်မက်တစ်ခုစာပါ
မမက်ခင်က ပြီးနှင့်နေပြီ ။

“မလာခဲ့နဲ့ ”
အာခေါင်ခြစ် အော်လိုက်သံဟာ
အာခေါင်ထဲမှာပဲ မြုံနေတယ်
ဆီးကြို တွန်းကန်ဖို့ အားတွေ ရဖို့
ဘယ်ဆုကို ဘယ်လိုပန်ရမလဲ ..။

“ကယ်ကြပါဦး ...
ကယ်ကြပါဦးရှင် ဒီမှာ “ ... ” ရေနစ်နေလို့ ”
အမျိုးသမီး တစ်ဦးရဲ့ အသံ
တိမ် .. ဝင် ... သွား
စုတ်သပ် သံတွေက လွဲ
တစ်စုံတစ်ရာ လှုပ်ရှားခြင်း မရှိတဲ့
ပတ်ဝန်းကျင် …။

မေးခွန်းတစ်ခုရဲ့ အဖြေကို
ကြိုသိနေခဲ့သလိုမျိုး ငါသိနေရဲ့
ကူရာ ကယ်ရာ မဲ့တဲ့အဆုံး
ကယ်နိုင်လို ကယ်နိုင်ငြား
ရေထဲကို
စိုးရိမ်တစ်ကြီး ခုန်ချလာတော့မယ့်
ဗျာပါဒ ကိုယ်လုံးလေးကိုသာ
ရေထဲကနေ ခုန်တက်
ကုန်းရုန်း ကိုင်ချုပ်နေမိ ။

တစ်ကိုယ်လုံး
ပေါ့ပါး လွတ်လပ် လွင့်ပျံ
တကယ်တမ်းတော့
ဖမ်းဆုပ်လိုက်တဲ့
လက်နှစ်ဖက်က ဘာကို ဘာနဲ့မှ
မထိတွေ့နိုင်ခဲ့ ..။

မေမေ့ ရဲ့ သောက မျက်ရည်တွေ နဲ့ အပြိုင်
ငါ့မျက်ရည်တွေ …။

အိုင်လွယ်ပန်